طريقة عمل الفلافل

مرحبا يا جماعة
بصراحة دورت في الانترنت على طريقة منيحة لعمل الفلافل و ما في طريقة عبّت راسي مزبوط
يعني بالعربي ما في شي عجبني منها ، لا الطريقة ولا المكونات
حكيت ما الي الا الطريقة اللي بعملها انا في البيت
نفوت بالموضوع <<<< (بلا فلسفه هههههههه)
المكونات:
كيلو حمص
راسين بصل متوسطات
نص او تلات ارباع ضمة بقدونس و يفضل نشيل العروق الكبار منها
مممممممممم شو كمان؟؟؟؟
ملح
كربونة طبيخ (هاي اللي لونها ابيض) نصف ملعقة صغيرة أو أقل شوي
ملعقتين بهار فلافل خاص ( طبعا اللي ما عندو بهار فلافل بقدر يعلمو هو بنفسه : كزبرة حب مطحونة ناعم كمون القليل من الكراوية الحب مطحون ناعم اي نوع بهار بتحبوه بس لا تكثرو ، لانو الاساس الكزبرة و الكمون)
سن او سنين ثومه
اه صح نسيت الفلفل الاخضر : 5 قرون او حسب الرغبة
طبعا زيت عشان تقلوه <<<< ما بيتاكل ني هههههه

نيجي هلأ للشغل الجد
اول اشي بدنا نغسل الحمص و نتأكد انو ما فيه حجار زغار او تراب و وسخ
بعدين ، انا بنقع الحمص في الليل في مي عادية و بتركة للصبح ، لتاني يوم
هلأ بكون الحمص طري و بنقدر نطحنه او نفرمه او سموه زي ما بدكم
بنطحنه اول مرة لحاله بدون ولا اشي من الاضافات و المكونات ، يعني بس حمص
و نطحنه كااااامل لحاله
هلأ لما نخلص طحن المرة الاولي، بنكون احنا مجهزين البقدونس و الفلفل و البصل و الثومة و مقطعينهم قطع مناسبة و غاسلينهم طبعا
بنيجي للجولة التانية من الطحن ، بنصير نحط كمية حمص كمية مكونات بنسبة مناسبة
يعني شوي هيك و شوي هيك عشان يطلع المزيج متجانس و المكونات متوزعة بشكل منيح
و بنضل هيك لما نخلص الحمص و المكونات مع بعض

وهيك بنكون خلصنا الشغل الصعب ، بننقل المزيج في طنجرة تانية نظيفة
هلأ بنيجي للملح و الكربونة ، بنرشهم على المزيج و بنحركهم منيح منيح
اوكي؟
بعدين بنضغطهم منيح لحتى يصيرو متل العجينة و بنحاول بأي شي أملس بخلي سطح هالعجينة هاي
أملس كمان و بنسد الفراغات و بنحاول بخرج الهوا اللي بكون في النص لانو بخليه يخرب
المهم
هلأ بنيجي للبهار
بعد ما رصينا العجينة منيح ، بنرش البهار فوق العجينة بدون تحريك
يعني بنعمل البهار متل الطبقة العازلة او الغلاف للعجينة لحتى ما يدخل هوا او بكتيريا او اوساخ او اي شي تاني ، المهم بكون البهار طبقة عازلة.
بترك العجينة في مكان حرارته طبيعية (حرارة الغرفة او المطبخ ) لحتى الكربونة تعطي مفعولها ، بتخليه تقريبا ساعتين.
بعد هيك لازم نحفظه بالتلاجة في نفس الطنجرة و بدون تحريك كمان ، متل ما هو
هلأأأأأأأأأ
لما بدنا نقلي الفلافل ، بنصير نوخد من العجينة بشكل طولي ، فاهمين علي كيف؟؟؟ يعني ما بنوخد اللي على الوجه بس !!! بنصير نقص قص من أعلى الطنجرة لحتى نوصل قاع الطنجرة و بشكل عمودي ، لحتى نوخد كمية بهار مناسبة لكمية العجينة ، و بعد هيك ، الكمية اللي اخدناها ، بنخلطها مع البهار اللي عليها منيح منييييييييح ، و يفضل رشه مي بسييييييييييييييييييييييييطه لحتى تكون العجينه طرية و سهل التحكم فيها.ما تخلوها مرقه؟؟؟؟
هلأ بحمي الزيت عالغاز ، بنخليه حامي ، لانو اذا كان بارد الفلافل رح يشرب زيت كثير
و بنجيب الاله تبعة الفلافل اللي بتعمل الاقراص ، و اللي ما عندو بامكانه يعمل القراص الفلافل باستخدام ملعقتين مع بعض و يشكل القرص
طبعا سواء استخدمنا الاله او الملعقتين ، لازم نرطبهم بالمي لحتى ما تلزق العجينة فيهم و يصير صعب ننزل القرص عالزيت. و برضو لا تكثرو مي لانو الزيت حامي و بصير يطرطش.
هلأ بنصير نراقب فيهم. لما يصيرو طايشين على وجه الزيت ، معناته نضجو من تحت ، وصار لازم نقلبهم على وجههم التاني (حتى لوما طاشو على وجه الزيت ، لازم نتأكد منهم بلاش بنحرقو انتو و خبرتكم بالقلي عاد)
و طبعا معروف انو اللون الطبيعي للنضوج هو الذهبي المائل للبني.(بني فاااتح يعني)
مممممممممممممم
هلأ أكيد كلكم بتحبو توكلو شغلات تانيه معه ، انا افضل اشي عندي بندورة و زيتون و مخللات.
و انتم حرين .
صحتين و عافيه
عرفتو كيف ولا بدكم اجي اطعميكم كمان؟؟؟؟
يللا تشاو